Gunungkidul (DIY), INANEWS.id – Wong-wong penghayat kapercayan neng Gunungkidul saiki wis ora dhewekan manèh. Wong-wong kuwi wis padha nggabung neng limang paguyuban sing diakoni negara. Kabèh ana sangisoré MLKI lan wis sah hukumé.
Dinas Kabudayan Gunungkidul nyathet ana limang paguyuban resmi: Palang Putih Nusantara, Sumarah, Mardi Santosa Ning Budi, Pran Soeh, lan Kodrating Pangeran.
Kepala Dinas Kabudayan, Agus Mantara ngomong, organisasi kuwi wis bener-bener diakoni negara. “Dadi, ojo wedi. Negara wis ngakoni,” kandane Agus Mantara, Kemis (21/8/2025).
Baca juga: https://www.inanews.id/2025/09/kompol-cosmas-nangis-sawise-digebuk.html
Penghayat kuwi nyebar neng sangang kapanéwon: Girisubo, Rongkop, Saptosari, Semanu, Wonosari, Playen, Panggang, Karangmojo, lan Gedangsari. “Jumlahé pancen ora akeh kaya agama mayoritas, ning swarané tetep sah, haké podo,” ujare maneh.
Keputusan ratusan warga Gunungkidul ganti kolom agama kuwi dudu mung urusan administratif, ning tandha wani nglawan cap elek sing wis nempel suwé.
Mbiyèn akeh sing kepeksa nulis salah siji agama resmi ben ora dicurigani utawa ora kesandhung yen njaluk layanan umum. Saiki, wong-wong kuwi wis wani nganggo identitas asli.
Baca juga: https://www.inanews.id/2025/09/rusuh-demo-agustus-gawe-rugi-900-milyar.html
Kepala Dukcapil Gunungkidul, Markus Tri Munarja nerangké, owah-owahan kolom agama neng KTP dhasaré Putusan Mahkamah Konstitusi Nomor 97/PUU-XIV/2016. Putusan kuwi njelaské yèn penghayat kapercayan kudu diakoni neng dokumen resmi. “Saiki identitasé wis sah hukum. Negara ngakoni wong-wong kuwi senajan njaba enem agama resmi: Islam, Kristen, Katolik, Hindu, Buddha, lan Konghucu,” kandane Markus.
Nanging, owah-owahan kuwi ora iso sembarangan. Wong kudu gabung sik neng organisasi kapercayan sing wis kedaftar neng Kemenkumham. Yèn wis entuk surat resmi, bar kuwi Dukcapil iso ngolah kolom agama neng KTP lan KK.
Dukcapil nyathet ana 236 warga sing wis resmi nulis penghayat kapercayan neng dokumen kependudukan. Iki dilakoni sak bertahap wiwit taun 2020 nganti Juli 2025.
Baca juga: https://www.inanews.id/2025/09/belajar-saka-kasus-keracunan-mbg-neng.html
Markus ngomong, proses kuwi ora langsung jeblug, ning lumaku alon-alon karo pertimbangan dawa. “Warga wiwit wani nulis identitas penghayat kapercayan wiwit taun 2020. Saka kuwi jumlahé terus nambah nganti saiki,” ujare.
Dukcapil janji ndhukung administrasi kependudukan sing inklusif. Markus ora gelem ana wong sing kepinggir amarga kapercayané. “Kita nyemangati penghayat ben ora ragu. Negara wis njamin haké. Dukcapil yo aktif sosialisasi neng komunitas kapercayan lan rawuh neng kegiyatané,” tandasé.
(WAP)
Social Header